Qidalanma sağlamlığımızın əsas dayaqlarından biridir. Tədqiqatlar göstərir ki, bəzi qidalar xərçəng hüceyrələrinin yaranma və çoxalma riskini azalda bilər. Bu qidalar antioksidantlarla, fitokimyəvi maddələrlə və vitaminlərlə zəngindir. Diamed Medical Group olaraq sağlam qidalanmanı həm xəstəliklərin qarşısının alınması, həm də müalicə prosesinin dəstəklənməsi üçün vacib hesab edirik.

Brokoli və digər yaşıl tərəvəzlər

Brokoli, kələm, gül kələm kimi tərəvəzlər “sulforafan” adlı güclü antioksidant maddə ilə zəngindir. Bu maddə xərçəngə səbəb olan hüceyrə zədələnmələrinin qarşısını alır, immunitet sistemini gücləndirir və xüsusilə mədə, ağciyər və döş xərçəngi riskini azaldır.

Pomidor

Pomidorun tərkibində olan likopen güclü antioksidantdır və xüsusilə prostat xərçəngi riskini azaldır. Pomidor bişirildikdə likopenin təsiri daha da artır, bu səbəbdən bişmiş pomidor sousları və şorbalar faydalıdır.

Giləmeyvələr (yaban mersini, böyürtkən, qarağat)

Giləmeyvələrdə olan antosiya və polifenollar sərbəst radikalları neytrallaşdırır, hüceyrə DNT-sini qoruyur və xərçəng hüceyrələrinin böyüməsini ləngidir. Gündəlik az miqdarda giləmeyvə qəbulu immun sistemini dəstəkləyir.

Kök və portağal rəngli tərəvəzlər

Kök, balqabaq və şirin kartof kimi tərəvəzlərdə bol miqdarda beta-karotin mövcuddur. Bu maddə antioksidant təsir göstərir və xüsusilə ağciyər, dəri və mədə-bağırsaq xərçəngi riskini azaldır.

Qoz, badam və fındıq

Bu qidalar E vitamini və omega-3 yağ turşuları ilə zəngindir. Qozun tərkibindəki fitosterollar xərçəng hüceyrələrinin çoxalmasının qarşısını alır və iltihab proseslərini zəiflədir.

Sarımsaq və soğan

Təbii antibiotik sayılan sarımsaq və soğan tərkibindəki allicin maddəsi ilə bədəndəki toksinləri təmizləyir, xərçəngə səbəb olan hüceyrə mutasiyalarının qarşısını alır.

Yaşıl çay

Yaşıl çayda olan katexinlər hüceyrələrin DNT zədələnməsini azaldır və xərçəng hüceyrələrinin böyüməsini dayandırır. Mütəmadi yaşıl çay içmək həm immun sistemini gücləndirir, həm də antioksidant balansı qoruyur.